Ua faamanuiaina se alii talavou o le tatou atunuu o ia lea o Lynham Mariner i se avanoa sikolasipi a le Malo o Iapani, o le a aoaoina ai i se faailoga maualuga mo tomai faainisinia lea e ta’ua o le hydraulic and costal engineering.
O le faaiuga o lena vaiaso na faalauiloa ai e le sui o le Malo o Iapani i Samoa le maua e lea tamafanau a le atunu o le avanoa sikolasipi o le a sueina ai lona faailoga o le Master i le Iunivesite o Osaka i Iapani.
O Lynham sa maua le isi ona faailoga o le Bachelor of Civil Engineering mai le Iunivesite o South Bank i Lonetona i Peretania ma o le faalauteleina o lona tomai faainisinia i le iunivesite o Osaka o le a saga faaaupegaina ai o ia i tomai i lea matata, ma faaaoga e tautua ai le Malo ma lo tatou atunuu i le faalapotopotoga o le Pulega o le Suavai.
O loo ofoina mai e le Malo o Iapani i ana fesoasoani mo Samoa nisi o avanoa sikolasipi e mafai ona agavaa iai o tatou tagata i tomai tau aoaoga ma isi.
O lea Malo o loo tele lona sao i le atinae o aoaoga i Samoa e pei ona faatupe i nisi o ana polokalame fesoasoani le fausia ma le toe faafou o faleaoga tulagalua.
