Ua sosoo vaiaso o lenei masina amata o le tausaga fou ma sailiga a leoleo ua maua ai nakoti e pei o laau faasāina o le maruana ma sikaleti maruana, lea ua taofia ai se taulealea 34 tausaga o le nuu o Vailoa Palauli i le motu o Savaii.
O laau ua ola lauusiusi, o laau o loo totō ma faafailele i totonu o paelo, o lau maruana ua mamago faapea ma sikaleti maruana ua uma ona ta’ai, na maua i lea sailiga a malu o le malo.
Ua ave ai le faafetai a le matagaluega o leoleo, falepuipui ma le toe fuataina, i le lagolago a alii ma faipule o nuu ma afioaga i le faailoa atu o ia gaioiga solitulafono e aafia ai nakoti lea e faasino tonu i laau faasāina o le maruana, o le pauta o le aisa, ma fualaau faasāina.
O le aso 6 o Fepuari o le a tulai ai le taulealea 34 tausaga le matua lea ua molia i le umia ma le totōina o maruana i luma o le faamasinoga.
O le aso foi lea ua faatulaga e tutulai ai ma le toa sefulufa o tagata ua molia i le umia o le aisa, laau faasāina o le maruana ma le umia o paipa e faaaogā e ula ai le aisa, i latou ia na taofia mai i le sailiga a leoleo poo se drug raid i Malifa i le Aso Faraile na tea nei.
