E le o solomuli leoleo i le sailia o faiga solitulafono i le faaaoga o laau faasāina o le maruana ma le pauta o le aisa, o nisi o ituaiga o nakoti ua toatele nisi ua molia ai ma faia iai faasalaga a le faamasinoga.
Ua faailoa e le matagaluega o leoleo falepuipui ma le ola toe fuataina, e 41 tausaga o se tamā e mai le afioaga o Sapapalii ua molia i lona umia o laau faasāina ina ua maua e leoleo i Tuasivi se valaau, sa faailoa atu ai e iai se tagata o loo faatauina atu maruana.
Na tali leoleo i le valaau ma agai atu loa ma maua lē ua molia ma lana taavale ma auina loa i le ofisa o leoleo i Tuasivi mo sailiiliga.
Na maua e leoleo ni afifi maruana se valu, 10 fatu maruana, o paipa e faaaoga i pauta faasāina, tasi se ututau o le laau malosi o le ituaiga o le 12, ma se tinoitupe e tasi le afe lua selau lima sefulu tala.
O le aso 6 o Fepuari e tulai ai lē ua molia i luma o le faamasinoga. O se isi sailiga a leoleo na faaaoga ai se tusi faataga faaletulafono poo se search warrant na sue ai se fale i se vaega o le nuu o Tulaele, na taofia ai se alii ma molia i lona umia o ni paipa e fesootai ma le faaaogaina o le pauta o le methamphetamine poo le aisa.
O le aso 7 o Fepuari e tulai ai lē ua molia i le faamasinoga.
