E toa sefululima alii seila mai Samoa ua faamanuiaina i galuega i luga o vaa o le kamupani o le New Zealand Rail, i le tuanai ona faasalalau e le kamupani vaa a Samoa nisi o iai lea tomai aoaoina, e talosaga mo ia avanoa faigaluega.
O se lipoti o loo faailoa ai e le Ofisa Sili o le pulega o le kamupani vaa le Samoa Shipping Company, le afioga Lautimuia Afoa Uelese Vaai, e toaono seila ua lata ina mae’a ona tapena o latou pepa malaga, i le fuafuaga o latou ia o le a muamua, ae o le isi toaiva e mulimuli atu.
O ni avanoa tāua lea mo alo ma fanau a le atunuu ua a’oa’oina i tomai mo galuega i luga o vaa o le sami, ma ua faailoa e le pulega o le kamupani vaa a Samoa o feutanaiga ma le kamupani vaa o le NZ Rail, e ono mafai ai ona maua e seila o le a galulue i luga o latou vaa avanoa e maua ai le visa e nofomau ai i Niu Sila e avea o se tasi o aiaiga o a latou avanoa faigaluega.
A o lei faagaioia lea laasaga pe afai e faamautu, e tolu tausaga le visa e mafai ona talosaga ai i latou e nonofo ai i Niu Sila ma faigaluega pe a mae’a le 12 masina muamua.
O le amataga o lenei vaiaso na faailoa ai e le Ofisa Sili o le pulega o le kamupani vaa a le atunuu, le toe faaauau o avanoa faigaluega mo seila mai le atunuu i vaa tetele i Europa, ma o le taimi nei e 300 tamafanau a Samoa ua toe galulue i luga o vaa la’uoloa ma meli la’upasese.
