O le masina fou o Me i le aso 28 e toe usuia ai le fonotaga a le Palemene, lea o le a faataatia ai ma le tala autu o le tupe a le Malo mo isi ana fuafuaga faaauau i le isi 12 masina pe a mae’a le tausaga faaletupe o loo faagasolo nei i le faaiuga o le masina o Iuni.

O fuafuaga o le tala autu o le tupe e iai le talitonuga o le a faasoa ai seleni e lē gata o galuega a matagaluega ma faalapotopotoga a le Malo, ae o tapenaga mo le taligamalo i le Fono a Malo o le Taupulega ia Oketopa.

O se taligamalo e manaomia ai tupe e faatino ai fuafuaga eseese, ma o Ausetalia le tasi o Malo ua faailoa lautele lana fesoasoani tupe e lagolago ai lea tala o le tupe i se aofaiga e 20 miliona tala tupe Ausetalia, poo le 36 tesimale 7 miliona tala Samoa.

Ua faailoa e lea malo i se pepa o faamatalaga o le a tuusa’o lana fesoasoani tupe i le faasoa a le Malo i tapenaga o lea fono tele faavaomalo.

O le faamautuina o lea fesoasoani ua sainia ai se maliega i le va o le Minisita o Tupe le afioga Lautimuia Afoa Uelese Vaai ma le sui o le Malo o Ausetalia e faamautu i lo tatou atunuu le Komesina Maualuga le susuga William Robinson.

O le lagolago a lea Malo i le faatupega o le tala o le tupe fou ae autu i le fono a Malo o le Taupulega ua soosoo tau’au faatasi ai ma isi paaga totino o loo fesoasoani foi i le taligamalo a Samoa e pei o le malo o Niu Sila, le faletupe o atinae o asia, faletupe o le lalolagi ma le Iuni a Europa le European Union poo le EU.

Ua faaopoopo le 36 tesimale 7 miliona o le fesoasoani a Ausetalia i le 50 miliona tala Ausetalia poo le 91 miliona tala Samoa sa sainia ai se maliega a le sui o lea Malo ua mae’a lona taimi galue le tamaitai o Emily Luck ma le minisita o tupe.

O lea fesoasoani e auauai ona faasoa mai i totonu o le valu tausaga.

Ua avea le Minisita o Tupe le afioga Lautimuia Afoa Uelese Vaai ma sui o le Malo e molimoli le faafetai i le sui o le malo Ausetalia i Samoa ona o le agalelei pea ma faatuatuaina pea lo tatou malo i le faasoa mai o ana fesoasoani auā galuega faatino o lana tala autu o le tupe.