E leai ni fale poo nisi meatotino a le atunuu na faaleagaina i galu lea na oo i le pa’u matū ona o le Tsunami e mafua mai i le maugamū i le aliti tai i le sami i Tonga, e leai foi ni tagata o le atunuu na aafia.
O le lipoti lea mai le Komiti o Faalavelave Faafuasei sa galulue e mataitu lapataiga o le Tsunami i le atunuu i le afiafi po o le Aso Toanai na te’a nei.
O le amataga o le vaiaso na talo ai le feiloaiga a le Komiti ma le vasega o Tusitala e faailoa ai le tulaga sa faatino ai tapenaga uma aemaise o lapataiga na tuuina atu mo le nofosilafia o le atunuu.
Taua e le Komesina o Tineimū Tanuvasa Petone Mauga “Na muamua lava maua le valaau mai le motu tele i Salafai i le afioaga o Satupaitea faapea foi Vaitoomuli ma Vailoa lea sa tali atu ai le auaunaga a le Pulega o Tineimū i Maota na vaavaalua ma le Matagaluega o Leoleo mai Vaitoomuli ma maitauina foi e fai le assessment e tilotilo ai foi poo a tulaga na oo iai le sua o le tai e pei ona lipotia mai e nisi o le mamalu o le atunuu. Ia e taunuu atu le Pulega aemaise foi malu o le malo ua tele lava ina tuua e le mamalu o le atunuu nofoaga tulalata i le talafatai aea agai i nofoaga saogalemu”
Na faafetaia ai foi e le Pulega le lagolago a le mamalu o le atunuu aemaise o pulega o alii ma faipule ina ia mautinoa o loo saogalemu tagata o le atunuu.
A’o mataituina ai pea i le taimi nei aluga o le maugamū i Tonga o lea foi ua lē mapu le taulogologo a le komiti e ala mai i le Ofisa o le Vaai Tau i le nofo tapenapena o le atunuu i uiga faaletonu o le tau i le amtaga o lenei tausaga fou. Faailoa e le Ofisa Sili o le Vaai Tau o le vaai mamao o loo iai le avanoa e ono latalata atu ai i ogasami o le atunuu se afā ma ono aafia ai Samoa i le isi 7 aso.
Taua e Dr. Luteru Tuvale “O le taimi nei o loo faaauau pea uiga mataitū ma tulimatai pea poo fea e agai ai vaega ia, o le isi 7 aso o lea e iai avanoa e pasi mai ai se afā i le sone o loo iai Samoa”.
