Ua vasa’i le tuuina mai o se lipoti masani a le soifua maloloina e faailoa lautele ai le tulaga o iai le pipisi o le faamai Koviti-19 i lo tatou atunuu.

Ae o se avanoa na fesiligia ai le Sui Faatonu Sili aoao o le soifua maloloina le alii fomai o Dr Glen Fatupaito, na ia faailoa ai e lē o toe tutusa lava le maualuga sa iai le numera o tagata na aafia, ma le tulaga ua iai i le taimi nei.

Faaalia e le sui faatonu sili talu ona le toe faamalosia le tele o aiaiga o puipuiga faalesoifua maloloina o le koviti, o le numera o loo lipoti atu o gasegase o loo i lalo ifo le aofaiga i le 20.

O falemai faaitumalo ma nofoaga tutotonu o auaunaga a le soifua maloloina i nuu ma afioaga i tua o loo faaauau pea ona faailoa atu tagata o loo aafia, ma o nisi ua faalua pe faatolu ona maua i le koviti.

Na pau le fautuaga masani o loo ave pea i le atunuu o le tausisia o le tumama lautele, ma faaeteete le feoai pe afai ua toe aafia pe faatoa maua i auga o le faamai.

O le isi tulaga o loo faaauau pea e le matagaluega o le ave i Niu Sila mo suesuega atili mo le fia iloa poo le a tonu le ituaiga o vairusi o le koviti o loo i Samoa ina ia faamauina ai e le matagaluega nisi suiga o le vairusi ua oo mai i lo tatou atunuu.

E lē o mautu se taimi e toe maua ai se lipoti mai le soifua maloloina e faailoa ai ni faamaumauga tonu o gasegase fou o le koviti, ma se aofaiga o tagata ua toe aafia i le vairusi.