HRPP Headquarters
HRPP Headquarters

Masalomia le manaoga o nisi faipule HRPP ina ia suia le latou taitai

Ua le’o toe agai i le nofoaga autu o le vaega faaupufai e Puipuia Aiā Tatau o Tagata nisi o latou sui faipule o le faafaletui o le molimau mai lea a se molimau faatuatuaina o se sui lagolago o le HRPP o se faipule foi ua lē finagalo e faailoa lona tagata seia iai se taimi ona talanoa mai lea ma faailoa sona finagalo i le mataupu i le tatau ona suia le taitai o le patī. 

O nisi o sui faipule ua lē toe agai i le nofoaga tutotonu i Petesa ua faaalia e le molimau ua latou manaomia le iai o se suiga i le taitaiga o le vaega faaupufai e mafua i tapenaga o le palota tele seia oo ina tutupu ma alia’e mai tulaga na lē mautonu ai upufai o le malo.  

Na maua se fesootaiga i se tasi o faipule o lea faafaletui ae le’i mafai ona talanoa mai ona o loo feagai ma se faalavelave e tau i lona aiga peitai o le ripoti a le niusipepa a le Samoa Observer i le vaiaso ua mavae ua fofola ai se finagalo o le faipule o le itumalo faapalota o Sagaga No.1 sa avea ma Minisita o le Kapeneta i le paeaiga ua mavae a le Palemene le afioga Loau Solamalemalo Keneti Sio ma ia finauina ai le tatau loa ona faia se suiga i le taitaiga o le latou vaega faaupufai. 

O le feiloaiga i le vaiaso ua mavae a nisi o tusitala ma le taitai le susuga Tuilaepa Lupesoliai Sailele Malielegaoi sa ia faailoa ai ua nofo sauni i le taimi e soalaupule ai e le latou faafaletui lenei mataupu. E silia ma le 20 tausaga talu ona avea Tuilaepa ma Palemia o Samoa o tausaga foi ia sa lagolagoina ai faipule o le faafaletui a le HRPP e avea ma taitai seia oo mai i le palota tele ua maea ia Aperila lea na lē toe maua ai e lea vaega faaupufai se numera o nofoa e faaauau ai pulega a malo lea sa tu i le foe mo le lata i le 40 tausaga. 

Ua molimau mai se tasi o faipule o lea faafaletui o lona lagona e tuua loa e le faipule o le itumalo palota a Lepā le taitaiga sola loa ma le maopoopoga o sui faipule. Sa faaailoa e le molimau faatuatuaina e pei ona sa maua ai fesootaiga i le amataga o lenei vaiaso e faapea o le Aso Gafua na faatulaga e fono ai le faafaletui i le 11 i le taeao peitai e le’i taunuu ona e lei auai atu nisi o faipule o le vaega faaupufai. 

Share on facebook
Share on twitter
Share on email
Share on whatsapp
Scroll to Top

Keep uptodate with Radio Samoa activity & promotion

* indicates required