Ua masalomia le ono iai o le fualaau faasāina o le methamphetamine poo le aisa i totonu o le apa pia ua faaigoaina o le Honey Bear House Beer.
O lea ua sau le lapataiga mai leoleo i Aukilani e faatatau i le apa pia lenei ma ua suesueina ai nei foi methamphetamine ua aumai i totonu o Niu Sila e faaaogaina ai apa pia, ona e iai le masaloga ua iai nisi ua ma’umau ai soifua mai le inuina o lenei pia.
O loo iai le talitonuga o sui o le ofisa e ono lei faatauina i tua i faleoloa poo faatauga faia online, peitai e ono iai se vaega o le uta na aumai ai apa pia nei ua maua e nisi.
O lenei uta o apa pia nei o le Honey Bear House Beer o loo iai apa pia e tusa ma le 473ml le telē, e lanumoana le apa ma le ata o le bear ma lomiga e lanu mumu.
Ua tuuina mai ai ma le talosaga e aua ne’i inuina ma ia vave faafesootai le ofisa o leoleo i le 105 poo le Crime Stoppers i le 0800 555 111.
E faatalitalia e iai nisi suesuega o le a faaauau ona faia i lenei mataupu a o faasolo pea ona maua mai nisi lipoti lata mai o lenei apa pia e lē o faatagaina ona faatau i totonu o Niu Sila.
