Maoa’e le lagolago a le malo, $4miliona le fesoasoani mo le Toa ma le Fetu o Samoa

O le Ipu o le Lalolagi i le lakapi liki i le tausaga e 2022 e $900,000 tala le fesoasoani a le malo i le Toa Samoa sa fa’aauala mai i le Pulega o Tupe Teu Faafaigaluega faavaomalo le Samoa International Finance le SIFA, ae o le Ipu o le Lalolagi i le masina nei lea ua masii iai le ‘au a tama’ita’i i le lakapi liki le Fetu Samoa ma le ‘au a ali’i le Toa Samoa e maoa’e le lagolago a le malo e 4 miliona tala.

O le sauniga na faamavae atu ai le malo i ‘au e lua i le taeao o le Aso Lulu o lenei vaiaso na fa’ailoa ai e le ta’ita’i o le malo le fesoasoani tupe e fa miliona, ma molimoli ai ma mo’omo’oga lelei ma fa’amanuiaga ina ia manuia le alo faiva o tama fanau a le atunu’u.

O se sauniga sa faatumulia ai luma maota o le malo ae sa faatumutumu mamalu na auai i le afioga i le Ao o le Malo le afioga Tuimalealiifano Vaaleto’a Sualauvi II sa ia taua’ao tagavai o le atunuu i kapetenei ma faiaoga o le Toa Samoa ma le Fetu Samoa e fa’alauiloa ai lo tatou atunu’u i taimi o a latou ta’aloga.

Le afioga ile palemia susuga Laaulialemalietoa Leuatea Polataivao Fosi ise vaega o lana saunoaga ile sauniga na faailoa ai le fa miliona o le fesoasoani a le malo ma ave ai foi ma faamanuiaga ile Toa ma le Fetu Samoa. O le aso Tofi lenei ua tuua ai le atunuu e ana au lakapi liki e lua mo le ipu o le lalolagi e amata faagasolo ile aso Tofi o le vaiaso fou.