O le alii ia Vaipava Nevo Ioane o le ‘au siisii uamea mamafa a Samoa ua faamanuiaina nei i le pine siliva mo alii 67kg le mamafa ma maua ai le pine muamua a le atunuu i taaloga o Mālō o le taupulega o loo faia i Birmingham i Peretania.
O le mamafa na sii e Vaipava Nevo mo le sii malele (snatch) e 127kg ma e sili atu nai lo le mamafa sa iai muamua poo lana personal best e 125kg.
Na faatūina ai foi e Nevo se matati’a mo taaloga o le taupulega i le sii mālōlō poo le clean and jerk e tusa lea ma le 166kg le mamafa.
Na manumalo le sui mai Initia Lalrinnunga Jeremy 19 tausaga le matua i le pine auro, tulaga lua Samoa Nevo Ioane 34 tausaga le matua (pine siliva) ae tulaga tolu ai le isi foi sui 19 tausaga mai Nigeria ia Edidiong Umoafia faamanuiaina i le pine apamemea.
Ua tau ‘ai ai nei Samoa ma maua ai lana ulua’i pine mo nei taaloga, o loo faagasolo pea taaloga ma o se taimi o i luma ona faasolo sii lea o isi sui o le ‘au a Samoa.
