E tulaga ese le taumafai a tamaitai o le Manusina a Samoa i le lakapi 15 lea na o latou faatoilaloina le ‘au a Fiti i le fetauiga i le Aso Sa i le taamilosaga o le Oceania Rugby Women’s Championships sa faia i le Gold Coast.
Na finau le taaloga mai le amataga ma mataina foi le puipui a tamaitai o le Manusina i le osofai malosi mai a le Fijiana i le sailiga o ni o latou ‘ai.
O le tamaitai o Cassie Siataga na aaina le sala mulimuli o le taaloga na sili ai loa ma ‘ai o le Manusina ae ua mae’a ma le taimi o le taaloga ina ua manatu le ‘au a FIti ua manumalo ae toe o se minute sa totoe o le taimi.
Faailoa le agaga faafetai o le tamaitai kapeteni o Sui Pauaraisa ma lana ‘au ona o se isi laasaga lea i luma ina ua faia’ina ai FIti sa siamupini i le Oceania.
Ua faaleo e le faiaoga ulu o le ‘au, Mataafa Ramsey Tomokino i luga o le itulau o le facebook a le Manusina le agaga faafetai i le tapuaiga a le atunuu i soo se itu o le lalolagi ua a’e manuia ai faiva o le Manusina.
O ‘ai o le taaloga Fijiana 18, Manusina 19.
