Ua suipi faalua nei le Vaega faaupufai a le Faatuatua i le Atua Samoa ua Tasi ina ua tuuina mai le faaiuga a le faamasinoga maualuga e faaleaogaina ai le Malelega a le Ao o le malo ina ia faaleaogiana le faigapalota muamua a le atunuu i le aso 9 o Aperila ae toe fai se isi faigapalota.

O se tala faasolopito lea i le talaaga faapolokiki a Samoa i le suia ai nei o le faigamalo talu mai tausaga e tele ua tuanai ae le gata i lea o le ono tulai mai o se Palemia Tamaitai mo le uluai taimi.

O lenei faaiuga na autasi uma iai faamasino e toatolu na nafa ma lea mataupu e aofia ai ma le afioga i le Faamasino Sili Satiu Simativa Perese.

Taua e le Loia na tulai mo le vaega faaupufai a le FAST Taulapapa Brenda Heather Latu i ofisa faasalalau i le maea ai o le faamasinoga e faapea “ o le faaiuga a le faamasinoga maualuga na tuuina mai e leai se malosiaga faaletulafono na faatino ai le poloaiga a le Ao o le Malo e toe fai ai se isi faiga palota”

Na ia taua foi “ua toe foi faaiuga na fai i le faigapalota i le Aso 9 o Aperila ma poloaiga na fai i le Aso 12 ma le Aso 16 o Aperila iai latou ia na manumalo o le a tumau pea”.