E ui lava ua mae’a le isi vaega o le finauga faaletulafono i vaega tau konekarate mo le alo o Samoa o loo siamupini nei i le lalolagi i le fusi o le paga Cruiserweight, le susuga Jai Opetaia, ma ua manumalo ai, peitai mo le alii o loo finauina lenei mataupu e faasaga ia Opetaia, e na te lē o ioeina ua muta ai ii lenei finauga faaletulafono.

O le vaiaso talu ai na sau ai lipoti mai Ausetalia i le ono lamatia o le fusi o loo tauave nei e Opetaia, ma e ono faalēaogaina ai lana siamupini a o tālia se iuga o le mataupu na finau ai lana promoter poo le alii sa faalauiloaina fusuaga a Opetaia, le alii o Dean Lonergan ma lana kamupani o le D and L Events.

Na mafua lenei feteena’iga ina ua taumafai le alii o Opetaia e faamuta le latou konekarate ma le kamupani a Mr Lonergan, le D and L Events, ina ua lē toe maua e le kamupani a Lonergan lana feagaiga i le TV ma le Fox Sports.

Na ave e Lonergan le mataupu i le faamasinoga i lona manatu ua lē faamamaluina e Jai Opetaia le latou feagaiga poo le konekarate e avea ai latou ma promoter mo ana fusuaga, ma na ta’ua e loia sa tulai mo le D and L Events, e toe 18 masina o loo totoe i le konekarate na sainia ma Opetaia e fusu ai i lalo o le faamalumalu a le latou kamupani.

I le itu a Opetaia, na ta’ua e lana loia Barrister Franco Corsaro SC, e lei iai i le feagaiga o le konekarate a lana client se aofaiga patino o ni fusuaga e tatau ona fusu ai Opetaia a o iai i lalo o le konekarate ma D and L Events; lona uiga e leai se vaega o le a saisaitia ai i le itu tau fusuaga.

O le iuga la o lea uluai finauga e pei ona iai i le Aso Faraile talu ai na aumai ai le faaiuga a le alii faamasino o le Supreme Court, Justice Burns, e faaleaogaina le talosaga a Mr Lonergan, ma ua iai le avanoa mo Opetaia e toe saili ai se isi vaega e latou te faakonekarate e faalauiloaina ana fusuaga.

O se tala fiafia lena mo Opetaia, e pei ona ia ta’ua ina ua mae’a mai le faamasinoga i le Aso Faraile talu ai, o lea ua nofo sauni e toe fusu e puipui lana fusi i lalo o se isi kamupani fou o le a faalauiloaina ana fusuaga.

Peitai o le manatu o le alii o Dean Lonergan e lei taitai mae’a le la finauga lenei ma Opetaia, ma o loo maumaua’i mai pea o loo iai lona faamoemoe e toe agai foi i le faamasinoga i lenei lava mataupu.

E manatu pea Lonergan, e tusa lava pe toe saini se isi konekarate fou a Opetaia ma se isi kamupani, ae e lē mafai lava ona toe avanoa e fusu mo le puipuiga o lana fusi pe afai o loo iai pea ni finauga faaletulafono e tatau ona faamanino; ae o lea e toe 18 masina o loo totoe o le konekarate ma latou, lona uiga e iu ina mamulu pe toe aveese ai le fusi mai ia Opetaia, ona o le umi o le taimi o le a lē toe fusu ai e puipui lana fusi o le siamupini o le cruiserweight.

Ta’ua i lipoti o le tausaga e 2017 lea na amata ai ona matuā lauiloa mai Lonergan ina ua manumalo le alii fusu o Jeff Horns lea sa ia faalauiloaina ana fusuaga, ma toilalo ai le alii fusu ta’uta’ua o Manny Pacquiao i le fusuaga na faia i Suncorp Stadium i Brisbane.

Ae mo le alii Samoa Ausetalia o Jai Opetaia, o le tausaga talu ai lea na matuā mati’e ai le tulai mai o le mataina o le fusu a lenei alii talavou, ina ua ia faatoilaloina le alii sa faatolu ona avea ma siamupini o lea fusi, le alii o Mairis Briedis o Latvia, o lea fusuaga na faia i le masina o Iulai i le tausaga talu ai 2022 i Gold Coast; ma o se fusuaga matautia lea ona sa manumalo Opetaia i ‘ai e ui ina sa matuā mafatia i le ta’ei o lona auvae (jaw).

O le alii o Jai Opetaia, e lei iai sana faia’ina mai ana fusuaga faapolofesa uma e 22 na fusu ai, ma o le 17 mai na manumalo sa malo ai i le tu’i oti (knockout).

O se alo o Samoa na matuā lauiloa atili ma viiviia e ona tagatanuu Samoa ma le lalolagi ina ua tulaueleele i laufanua o Samoa i le tausaga na se’i mavae atu ai a o aga atu le atunuu e faailoga aso fiafia o le faamanatuina o le 60 tausaga o le Tutoatasi o Samoa, ma auai ai a o patipatia e le atunuu atoa le a’e manumalo o faiva i faagatama eseese o ana tamafanau e pei o Jai Opetaia, ma isi uma alo o Samoa i taaloga lakapi, siisii u’amea mamafa, fusuaga ma isi.

O le a tulituliloa pea se isi vaega e ono suia iai lenei mataupu.