Ua faaiuina ma le manuia le taumafai o se tasi o ofisa sinia o le nofoaga autu o suesuega faasaienisi a le Malo o Samoa le tamaitai le susuga Masuisuialemalietoa Dr Seeseei Molimau Samasoni, o loo faauluulu iai le vaega o suesuega o laau toto le Plants and Postharvest Technologies Division i le nofoaga o suesuega faasaienisi i Nafanua.
Sa auai o ia i se aoaoga na faatupe e le nofoaga tutotonu o suesuega tau faatoaga a le Malo o Ausetalia i le polokalame ua ta’ua o le Meryl Williams Fellowship.
E toa 160 tagata na talosaga mo avanoa e maua ai lea aoaoga mai atunuu Asia ma le Pasefika, ma faamanuiaina ai Masuisuialemalietoa Dr Seeseei.
O lea avanoa tau aoaoga e faapitoa lava ia i latou o galulue i suesuega faasaienisi i mataupu tau faatoaga.
Ua ave le faamalo a le taitaifono ma le komiti faatonu o lea nofoaga o suesuega faasaienisi a Samoa aemaise o le pulega i le faamanuaiina o le taumafai o se alo tamaitai o le atunuu o se tasi o loo galue ai i le nofoaga o suesuega faasaienisi a lo tatou atunuu.
