Ua faia le faaiuga a le Supreme Court e faatatau i le mataupu sa tuuina atu i le faamasinoga sa finauina ai le tuu i lalo o tausaga e mafai ai ona palota le tagata i Niu Sila nei ma ua faailoa mai i le aso ananafi o le kulupu ua faaigoa Make it 16 lea na o latou aveina le mataupu i le faamasinoga e finauina ai le tatau ona tuutuu i lalo le tausaga e mafai ai ona agavaa le tagata e palota.
Fai mai sa ave le mataupu i le faamasinoga maualuga ma le faamasinoga o apili ae o le amataga o le tausaga nei na oo ai loa le mataupu i le Supreme Court.
Fai mai le kulupu lea o tulafono o palota e le o ogatasi ma le Bill of Rights Act i le mataupu e aofia ai le faailoga tagata ona o tausaga.
O le vaiaso nei la ua ta’ua mai i le lipoti ua faia le faaiuga a le faamasino o Justice Ellen France e sese le faamasinoga o apili i le faia o se faamatalaga faalauiloa ma ua taliaina ai le apili.
E lei leva nei ona pasia e le Palemene se pili e faapea o soo se faaaliga mai le faamasinoga lea e ta’ua o le declaration of inconsistency, o le a faatalanoaina faapitoa.
Fai mai a o lauina mai le iuga i le faamasinoga i le aso ananafi na vaaia le uulima o sui o le Make it 16 ma fetagisi ina ua manuia le latou finau.
