Ua silia nei ma le vaiaso talu ona tula’i mai le faalavelave lea na ma’umau ai soifua o nisi o tamafanau a Samoa na galulue i galuega faavaitaimi i Niu Sila nei, ae o loo faaalia pea le valevale alofa o le to’atele o tagata lautele mo i latou ua maliliu.
O nisi ua faaalia i le tuuina atu o seleni e ala i sailiga seleni na tuufaatasia e lē gata i le Fono Faufautua a Samoa i Aukilani, le PLF (Pacific Leaders Forum), le Mafutaga Soofaatasi a Faafeagaiga ae o isi foi sa faaalia le agaga fia lagolagosua e ala i le faia o sailiga fesoasoani mo le tele o tapenaga e aofia ai le faafoi atu o tino maliliu o nei auuso i Samoa.
O le afiafi la o le Aso Sa lenei, le aso 8 o Setema, lea ua faailo ai e le Ta’ita’ifono o le Fono a Ta’ita’i o le Pasefika i Aotearoa nei, le omai faatasi ai ma le tele o ana paaga, o le komiti faufautua faapea le tele o sui o Samoa, e tuufaatasia se sauniga faapitoa, o se memorial service e manatua ai nai tamālii ua motusia faafuase’i le mafutaga ma o latou uso a faigaluega, uo ma paaga aemaise nai o latou aiga.
E faapena ona manatua ai foi ma si o la’ua uncle, Faaofo Uili Faaofo, lea na faataunuuina ona toe sauniga i le aso ananafi, Aso Toonai, 7 o Setema.
I se faasilasilaga faalaua’itele, mai le ta’ita’ifono o le Pacific Leadership Forum, Teleiai Edwin Puni, na ia faailoa ai o le itula o le 3 i le aoauli o le Aso Sa, o le asō lea, aso 8 lea o Setema, o le a faataunuuina ai le sauniga i le Fale o Samoa i Magele.
Ua tapenaina e le Ofisa o le Konesula o Samoa mo tagatānuu o loo aumau i Aukilani le polokalame mo le faatautaiga o lea faatasiga.
Ua faamauina foi, o lea ua saunia ma tuufaatasia ai se itulau o le “Give a Little” page, e saili seleni, mo le aufaigaluega faavaitaimi e to’atolu, o nisi na faamanu’alia i lenei lava faalavelave, e pei ona faamauina o loo iai pea le tasi i tulaga ogaoga i le taimi lenei.
O lea faalavelave, na tula’i mai i le masina ua tuanai o Aokuso, ina ua lavea le van sa malaga mai ai ina ua taia pe so’a foi e se loli i le va o Bombay ma Ramarama.
O loo tatala le avanoa mo tagata uma e auai i lea sauniga i le aoauli nei.
