O le tamalii Samoa Kiwi logologoa i le kirikiti, Leaupepe Luteru Ross Poutoa Lote Taylor, ua ia faaalia, e faigata ona ia onosaia, ae e iai lona faalogona, o Neil Wagner, sa faamalosia e litaea ma le taaloga.

O le vaiaso talu ai sa folafola ai e Wagner lona litaea ina ua mae’a ona logo iai, o le a lē avea ma se vaega o le ‘au a Niu SIla mo le faasologa o taaloga faitaulia ma Ausetalia.

O Leaupepe sa taaalo faatasi ma Wagner i le tele o taaloga faitaulia, sa ia logo ai i le polokalame a le Around The Wicket a le televise a le ESPN e faapea, e iai se faalogona i lea faaiuga sa faamalosia ona faia.

Sa fesiligia Leaupepe e uiga i le tuu e Wagner o lona limatusi i lona gutu o se faailo o le tapuni o le gutu, a o ia samiina lona tapēina o le tama ta a Aferika i Saute i lana taaloga faitaulia mulimuli.

Sa vaaia ai foi o tui lona limatusi ogatotonu (tulou) i se tagata a o potopoto le ‘au mo le samiina o lea pe.

Faaalia e Leaupepe i le polokalame, i lona iloa, o se faailo ua faailoa mai ai o Wagner sa faamalosia e litaea.

Ma ia ta’ua ai, a faalogologo lelei i le faamatalaga a Wagner i le feiloaiga ma le autusitala, sa ia ta’ua ai le sauni e litaea, pe a mae’a le taaloga faitaulia mulimuli ma Ausetalia, o lona uiga sa avanoa e taalo.

O Leaupepe, e pei ona silafia ai ia Ross Taylor, e na o le pau ai lea o se tagata taalo kirikiti faavaomalo a Niu Sila ua taalo i le silia ma le taiselau taaloga faavaomalo ua taalo ai i faataotoga uma e tolu o le kirikiti, T20, ODI ma taaloga faitaulia tai lima aso.

Sa ia faaalia ai, ua lelei nei le momoe a le autatā a Ausetalia, ona e lē o iai Wagner i le ‘au a le Black Caps a Niu Sila.