Search

Manatu Hipkins e talafeagai le faaaogā o le Waka Jumping Law i le mataupu i le tamaitai Faipule o Darlene Tana

Na ta’ua e le ta’ita’i o le Labour Party, Chris Hipkins, o se gaioiga talafeagai pe a faaaogā e le Green Party le tulafono o le Waka Jumping Law i le mataupu o loo tulai mai le latou sui faipule lea ua faamavae ese mai le vaega faaupufai, le tamaitai faipule o Darleen Tana.

E pei ona avatu i lipoti ananafi, ua faate’a ese e le Green Party le tamaitai faipule i le Aso Sa talu ai ma tāpā ina ia faamavae ese mai le toe avea ma faipule o le Palemene, o se faai’uga e lē o taliaina e Tana, ae ua mae’a ona faamavae ese mai lona toe avea o se sui auai o le vaega faaupufai a le Green.

O le tulafono lenei sa matuā tetee iai le Green Party, peitai i se faatalanoaga a Hipkins ma le RNZ i le Aso Lulu, na ia ta’ua ai atonu na mafua lena tetee o le pati e faavae i se manatu faapea o lena tulafono e ono mafai ai e se pati ona faamalosia le aveese o se Faipule pe a lē ioeina manatu o le pati.

Saunoa Hipkins, e ese mai ai la le mataupu lea ia Tana, auā o le mea lea na tupu ia Tana, o se tasi ua masalomia (allegedly) lona faia o ni amioga i se auala e lē talafeagai ai le avea o se tasi ma Faipule.

E lei fia oo le saunoaga a le ta’ita’i o le Labour i le itu o loo aafia ai sootaga a le tamaitai Faipule i mataupu o loo tuua’ia ai ni faiga lē lelei i ni tagata faigaluega sa galulue i le pisinisi a lona toalua, e pei ona saunoa Hipkins, e lei vaai o ia i le lipoti mai suesuega a le Green Party lea sa faagasolo i lenei mataupu o loo aafia ai Tana.

Ae mo le tamaitai Faipule, MP Darleen Tana, o loo matuā teena e ia le lipoti o le suesuega na faia ma faapea mai, e leai se mea i le lipoti o ta’ua ai faapea na iai ni faiga lē lelei na faia i tagata faigaluega o ē na autovaa mai isi atunuu (migrant exploitation), e lē o ta’ua ai fo a mea e iai se mea e tuua’ia ai fua o ia i lea mataupu.

I le faatalanoaga a le RNZ na fai ma le ta’ita’i o le Labour, na saunoa ai Hipkins, e leai se malosiaga o le a faaauau ai pea ona avea Tana o se sui faipule tutoatasi.

Saunoa Hipkins, ‘o le mea moni sa filifilia mai Tana o se sui o le Green i le Palemene, o lea la ua faamavae ese mai le pati a le Green, lona uiga ua tatau foi la ona faamavae ese mai le Palemene, ma malolo loa.’

O le taofi foi lena o le afioga i le Sui Palemia, Hon Winston Peters i sana saunoaga i le la talanoaga ma Andrew Dickens o le Newstalk ZB, na ia ta’ua ai, o se faalumaina (disgrace) lenei mataupu matagā ua tulai mai.

Saunoa Peters, atonu o le a taumafai Tana e nofo pea o se Faipule i le Palemene ma auai atu i le Te Păți Māori.

‘O lea lava e tumau o se Faipule, ae ua lē tatau ona toe faipule, e tatau i tagata uma taitoatasi ona talia ni tuua’iga ua faia iai ae foliga mai e lē o le mea lena o loo mafaufau i ai Tana.’

E manatu Peters, e lē o lava gaioiga o loo fai e le Green Party ina ia faamautinoa ua aveese Tana mai le Palemene.

O le a tulituliloa pea nisi lipoti lata mai o lenei mataupu.

Tala sili ona faitaulia

SAMOA UPDATE

PODCASTS

Listen on

TALA FOU MAI SAMOA

FAATALATALANOAGA

POLOKALAME A LEOLEO

Keep uptodate with Radio Samoa activity & promotion

* indicates required