O le saoasaoa o le faaaogāina e tagata o fesoota’iga televavave le social media o loo maua ai ata, o video ma faamatalaga eseese, ua aumai ai se lapata’iga mai sui o le auaunaga tuufaatasi a le malo o Ausetalia le AAP, i le tatau i tagata o loo galulue faatusitala i Samoa ma ē uma o galulue i leitio, televise ma nusipepa, ona mataāla i le faaaogāina o faasalalauga mai ia fesoota’iga, e pei o le api o foliga poo le Facebook.

O ia sui e to’alua o le Australia Associated Press sa faatinoina se a’oa’oga i le ofisa o le Komesina o Sulufa’iga ma le Vasega o Tusitala sa a’oa’oina ai i auala e ao ona mata’alia ai i le faaaogāina o ata, video ma faamatalaga mai ia fesoota’iga.

Advertisement

E māfua lea tulaga ona o nisi o ia faasalalauga e foliga e moni ae e pepelo ma taufaasesē.

O le faaaogāina i ni faasalalauga e aunoa ma le sa’ili’ili muamua o le moni atoatoa, e lautele ai le oo atu i tagata o tala e faasesēina ai.

O le faaaogāina foi o le polokalame faatekonolosi ua faaigoaina o le Artificial Intelligence le AI, poo le atamai fafau pe a faasamoa, e ao foi ona matuā malamalama iai i lona faaaogāina ina ia taofia ai le faasesēina o tagata i ni faamatalaga e maua mai lea polokalame faatekonolosi.

O le mae’a o lea a’oa’oga ua tupu ai se lagona o nisi sa auai i le a’oa’oga pe lē ua tatau loa ona iai se auaunaga i Samoa e tapuvae tasi iai le faia o se galuega o le sa’ili’ili lelei o ia faasalalauga ina ia mautinoa ai e moni atoatoa, ma taofi ai ma faasalalauga taufaasesē ua faatupu ai le popole i tagata, o le ita, lē mautonu ma le fefulituaa’i.

O le auaunaga a le AAP a Ausetalia o loo galulue ai ma auala o faasalalauga i lea atunuu e sa’ili’ili le moni atoatoa o ni faasalalauga ma lagolago ai i tusitala ma tagata faasalalau o Ausetalia i le saunia o a latou tala ma ata e faasalalau ina ia mautinoa o loo sa’o atoatoa mo le manino o le silafia e tagata.

O le Komesina Maualuga o lea malo i Samoa na ia tatalaina lea a’oa’oga mo le vasega o tusitala ma le ‘aufaasalalau i Samoa.