Ua faaleo i le Palemene se finagalo o le sui ta’ita’i o le Itu agai le tofa Lauofo Fonotoe Pierre Lauofo, ia toe faaa’e le faamālōlōga lē tumau a lo latou ta’ita’i le susuga Tuilaepa L Sailele Malielegaoi, ma le faipule o le tofa Lealailepule Rimoni Aiafi. 

Ae e pei ona silafia ua lu’i e le faipule o Lepa ma le faipule o Faleata 3 le faai’uga a le Palemene ua faamālōlō lē tumau ai e aunoa ma le maua o ni o la totogi, ma o loo tālia ai nei se faai’uga a le faamasinoga sili i lea lu’i faaletulafono ua mae’a ona su’esu’eina. 

O le lagona o le sui ta’ita’i o le Itu agai na auala atu i sona finagalo na tali ai i le folasaga faalauaitele a le Fofoga Fetalai i le Palemene i le Aso Lua na faailoa ai e le susuga Papalii Li’o Oloipola Ta’eu Masipa’u lona faanoanoa i tuua’iga ua faia e se faipule sinia ua lava lona silafia i tulafono o loo tausia ai le mamalu o le Palemene. 

Ua faailoa e le Fofoga Fetalai ua ia faamagalo i le ta’ita’i o le Itu agai, ae o le tuualalo a le sui ta’ita’i o le Itu agai ia toe faaa’e, o le faai’uga lea e faia i se finagalo autasi o sui mamalu o le Palemene na latou talia le fautuaga a le komiti o tulaga mamalu ma aloaia na faia le su’esu’ega i le faitioga a le faipule o Gagaemauga Numera Tasi, ia faamālōlō lē tumau ia sui faipule e to’alua seia iai se aso.