Ua mananao le toatele o sui o le council a Gore e faamavae lo latou pulenuu talavou.

O Ben Bell o le pulenuu aupito i laititi ona tausaga i le talafaasolopito o Niu Sila ua pale mai o ia o se pulenuu, peitai o lea e lei tele ni masina talu ona tu mai ae ua toe mananao le council e alu ese.

Talu mai ona uma le palota faaitumalo a Gore na faia i le masina o Oketopa o le tausaga talu ai, e lei iai lava se filemu i le va o ia ma isi sui o le council ona o ana faaiuga ma manaoga.

O lea foi na ta’ua i lipoti i masina talu ai ua le fetautalaa’i le pulenuu ma lana pule sili ia Stephen Parry ma o le masina talu ai na tofia ai le sooupu e tu i le va o i laua nei.

I le mae’a fono ai o le sui pulenuu ma isi councillors e toavalu a Gore, na sau ai loa ma le faaiuga ua tatau ona faamavae mai Bell, ma o lea foi ua mae’a logoina le pulenuu e tusa ma le faaiuga mai le fonotaga.

Na teena e le pulenuu le talosaga, ma o lea ua toe talo ai le isi fonotaga a le council i le vaiaso fou ma e le gata o le a toe fai ai le palota ae o le a iai foi ma le minisita ia Kieran McAnulty e fesoasoani.

I se faamatalaga mai le pulenuu anapo, o se faanoanoaga tele ia te ia le valaau ua sau ina ia faamavae.