E tusa ma le 50,000 moa mamate ona o le mu na tulai mai i le faatoaga o loo tuufua ai i Waikato.

O le te’a o le fitu i le taeao ananafi na aliae ai le mu ma o fale e lua mai le 12 o fale o le faatoaga a le Zeagold Nutrition lea na faaleagaina uma ai.

O se tala faanoanoa ua sau ai i le taimi o loo utiuti ai le sapalai fuamoa e pei ona molimauina i le tele o supamaketi le taugata o le fuamoa ua iai nei.

A o faapopoleina ai la tagata ona o le atili aafia o le maketi fuamoa, ua faamautinoa mai e le pule sili o le falemoa a Zeagold, e na o le 1.4% o moa o loo sau mai la latou faatoaga ma o lona uiga e le tele se aafiaga o le sapalai fuamoa ona o le mea ua tupu.

Ae mo le aufaigaluega ua faamaonia mai foi e le pulega o loo saogalemu ma e leai se isi o le toasefulu lua na iai i lea taimi na afaina ai.

O le Zeagold o le falemoa tele lea i totonu o Niu Sila o loo sau ai fuamoa, ma o loo faatauina i lalo o le igoa o Woodland ma Farmer Brown.