E lei mafai ona taula i le uafu i Apia le meli la’upasese o le MS Seven Seas i le taeao o le Aso Sa na tea nei, ma toe foi ai le meli ma lana pasese toatele sa faatulaga e maimoaina lo tatou atunuu i nofoaga eseese o le motu o Upolu, e masani ona faamaimoa iai, aemaise pasese e fia savalivali ma maimoa solo i lo tatou taulaga.
Ua faailoa i se pepa o faamatalaga na mafua ona lē mafai ona taula le meli, ona o le malosi tele o au o le sami.
O lea tulaga sa logoina ai le pailate o le vaa ma faailoa iai e lē mafai ona taula ona o lea faaletonu i le tau, peitai sa faia le faaiuga a le kapeteni e taumafai pea, ae na tulai mai ai se faaletonu na motu ai se tasi o maea malosi e taula ai lea meli tele.
Ina ua tulai mai lea tulaga na faatoa iloa ai e le kapeteni e lē saogalemu ma faia ai lana faaiuga e liliu ma toe foi i le isi atunuu ua faatulaga e afe iai.
O se faaletonu sa lē taunuu ai le faamoemoe o nisi o pisinisi, ma auaunaga e masani ona latou tautuaina pasese malaga a meli, ma maua ai seleni ina ua lē mafai ona taula le Seven Seas.
O le meli mulimui lea mo Ianuari, ae o le masina fou e valu meli tetele o le a afe mai i Samoa.
O le aso 1, 2, 6, o Fepuari faapea le aso 17, ma le 20, ae o le aso 26 o lea lava masina e lua meli e taunuu ai, o le tasi e taunuu i Savaii i Fagamalo e pei ona faailoa i le kalena a le pulega o uafu ma taulaga, ae o le isi e taunuu i Apia.
O itula e valu i le taeao o le a tuta ai ia meli la’upasese ae malaga tagata tafafao e maimoa solo i le atunuu, o le valu i le taeao ae malaga ese i le lima i le afiafi.
O le a tele tupe e sasaa mai i le tamaoaiga o Samoa i le masina fou pe a fua i le aofai o meli la’upasese o le a afea lo tatou atunuu.
