E 51 tausaga o se tamā ua lipotia mai na maliu i le vaeluaga o le po o le Aso Faraile na te’a nei, ina ua faafuasei ona so’a e se taavale i Tuana’imato.
O le itulau a le Matagaluega o Leoleo i luga o le facebook o loo lipotia ma faamaonia mai ai lenei faalavelave, ma ua ta’ua ai o se tamaitai e 23 tausaga lea na aveina le taavale na lavea ai lenei tamā.
Ua molia nei lea tamaitai i le avetaavale faatamala ua faapogai ai le maliu o se tasi.
Ua tatala i tua lea tamaitai e faatali ai le aso 14 o Aokuso 2023 e tulai ai i luma o le faamasinoga e tali i lona moliaga.
Mo le taimi nei o aiaiga ua faatulaga, e tatau i lenei tamaitai ona saini i le Traffic Enforcement Division i Matautu i Aso Lulu taitasi.
O loo momoli ai faamaisega a le matagaluega i le aiga faanoanoa o si tamā ua maliu.
