O lagona faateia, faanoanoa ma le lē saogalemu ua iai se tasi o pitonuu o Aukilani lea na tatui ai (tulou) le faatauoloa anapo.
O le tea laititi o le valu anapo na osofai ai e le gaoi le faleoloa o le Rose Cottage Superette i Sandringham ma o lea na alu atu le gaoi ma le agaese.
E tigaina manuaga o le alii faatauoloa ma auina atu ai i le falemai, peitai e lei umi se taimi ae uma loa lona soifua e tusa ma lipoti a leoleo.
I molimau a nisi o tuaoi o lea e lei mamao atu talu ona malaga atu le aiga e ana le faleoloa mo malologa i Initia ae vaai e le maliu le pisinisi, ma e le o le taimi muamua lea ua osofai ai le pisinisi.
O osofaiga nei a gaoi na tele ai lava ina taufaamatau, ave tupe ma faaleaga meatotino, peitai o le maliu ai o le faatauoloa ua atagia mai ai le lē saogalemu o soifua o tagata e faia nei pisinisi.
E oo mai i le taimi na tuufaatasia ai tala fou e lei maua le gaoi, ma o le taeao nei o loo faatali ai se aotelega o lenei mataupu mai leoleo.
