O le tugā tele o manu’aga o si alii avepasi lea na tulai mai le faalavelave na lavea ai le pasi o le Tuisamau Transport, i Sauano i Fagaloa i le tusa ma le lua vaiaso talu ai, o lea ua faamaonia mai e se tasi o lona aiga e lē o fia manao e faailoa lona suafa, ua iu lava ina maliu si alii avepasi.

O se tala faanoanoa lea i aiga o le susuga Luafalealo Tony Leniu. O loo maitauina foi i luga o le facebook le toatele o tagata o loo molimoli alofaaga ma faamaisega i le aiga o si alii avepasi, aemaise foi o i latou tonu na aafia ai i lenei faalavelave, poo tagata o le pasese.

O loo tele ina ta’ua ai ma faaleo le agaga faafetai o i latou o le pasese, i le mataalia ma se faaiuga vave na faatino ai e Luafalealo le gaioiga e pei ona ia faia, i lona naunauta’iga ia laveai mai soifua o le pasese ina ua tulai le faaletonu i lea vaega o le aualatele i le faaitu i Fagaloa.

I nisi o lipoti na auina atu muamua o lenei faalavelave na ta’ua ai o loo masalomia se faaletonu i taofi o le pasi, peitai sa iai le faamoemoe o leoleo e faatoa faamautinoa uma na lipoti pe afai e toe faafoisia le malosi o le susuga i le avepasi; pagā lea ua lē o lea le tulaga ua iai.

O le afioga Luafalealo o se tamalii ua loa lona soifua i lenei galuega, ua silia ma le 30 tausaga o le pisinisi lenei o pasi a lona aiga, le Tuisamau Transport mai Laulii, ma e tele foi nisi afioaga sa tautuaina e le afioga Luafalealo lea e manatua mai ai e le toatele, le alii avepasi i ona uiga tamalii, tausaafia ma le alofa naunau i soo se tasi e tietie i lana pasi.

E momoli ai foi faamaisega i le aiga faanoanoa i le motusia faafuasei o mafutaga mafanafana ma le tamā ona o lenei faalavelave sa lei fuafuaina.