O le alii o Herman Joseph Loto Sakaria mai Aukilani, lea sa lauiloa i lona igoa sa pese ai o Ermehn, ua lipotia mai i le 1News i le asō ua maliu.
O Ermehn o se tasi na avea ma sui o le Otara Millionaires Club and Radio Backstab, ma e masani ona faaigoa o le Godfather of South Auckland hip hop.
Sa masani ona vaaia lenei alii pese i luga o le stage e sasau solo ai lana sapelu ma pese, aemaise le vaaia soo o sulu lona ielavalava.
O lana album lona lua, ‘The Path of Blood’ na lilifa iai lagona o ana tagata faalogologo a o ia pese ma faamatala lona olaga na ola ai a o auai atu i le olaga o kegi.
I le 2012, na fai ai sana faatalanoaga ma le RNZ ma na ia talanoa ai i lona faanaunauga o le a ia tuua le olaga i kegi ae fai se isi aamataga lelei i lona olaga.
O luga la o le social media o loo faasoa ai le toatele o tagata Kiwi i lagona faanoanoa ona o le misia o lenei alii pese, ma toe talanoa ai i le tele o mea mananaia e manatua ai foi o ia, aemaise foi le faate’ia o le toatele i le maliu faafuase’i ai o lenei alo pese o Samoa.
