I le silia i le 30 tausaga o galue i le tomai fa’atusitala i nusipepa i Samoa, ma le leitiō faavaomalo a Niu Sila o se tala fa’anoanoa i tusitala sinia ma tino i matutua i lo tatou atunu’u, le maliu o se tasi sa latou galulue i tausaga ua tuana’i a’o le’i malaga atu i Niu Sila ma faamautū ai ma lona aiga.

O le susuga Alan Ah Mu sa galue e lagolago i le vaega o tala fou a le leitio polenisia le ulua’i ualesi faasalalau i le atunu’u na fa’aaoga ai le FM, o le nusipepa o le Samoa Observer, South Sea Star, Samoa Times ma isi auaunaga faasalalau tuma’oti i Samoa.

Sa galue foi o se tusitala so’oupu mo le leitiō a Niu Sila mo le sefulu tausaga.

O le Aso Lulu o lenei vaiaso ua faia ai ona toe sauniga i lona aiga i Lotopa e pei ona molimoli mai lona tino maliu mai Ueligitone Niusila e lagomau i Samoa.

E maliu Alan Ah Mu ua 68 tausaga o lona soifua ma e to’afā o la alo ma le tina o Sui Tiafau Lavea Ah Mu.