Ua ma’umau soifua ma faamanualia le silia ma le toasefulu anapo ona o faalavelave i luga o le alatele.
E toalua tagata maliliu ae manunua le toafa i le faalavelave tautaavale na tulai mai i le vaveao analeila i New Plymouth.
O le ‘afa o le tasi i le vaveao na tulai mai ai lenei faalavelave i luga o le State Highway 3 ma e faapea o le toalua ua ma’umau soifua na maliliu ai lava i le nofoaga na tupu ai le faalavelave e tusa ma lipoti a leoleo.
I Aukilani o lea foi na fetoai le van ma se pikiapu i le faasiusiuga o le Waterview Tunnel anapo ma e faapea o le isi taavale na sese le ituala na alu ai.
E toafitu tagata manunua ma i lipoti a le St John e toaono o loo manunua tigaina.
I lipoti e le tasi se ambulance na iai i lea nofoaga ona o le toatele o tagata manunua.
