O le po a nanei e tuuvaa ese atu ai lana Afioga le Ao Mamalu o le Malo o Samoa Afioga Tuimalealiifano Vaaleto’a Sualauvi II ma lana masiofo mai Samoa nei.
O le faamoemoe o le malaga e avea i laua ma sui o le Malo Tutoatasi o Samoa e auai i toe sauniga o le Tuumalo o lana Maiesetete Kuini Elisapeta II o lē sa avea ma Tupu Tamaita’i o Peretania Tele.
O le a malaga faatasi Lana Afioga ma le Failautusi o le Kapeneta ia Agafili Tomaimanō Shem Leo, o le Tamaita’i mai le Ofisa o le Vā i Fafo faapea ai le Faafeo mo le Ao o le Malo.
O le ā agai i Ausetalia le faigamalaga ua fuafuaina ai se vaalele e malaga faatasi ai ma nisi o taitai o le Vasa Pasefika i Saute.
O toe sauniga o le Tupu Tamaita’i o le a faia lea i le Aso Gafua o le vaiaso fou.
