O le vaiaso nei ua maimoa ai le toatele i se tasi o ata a le alii faatonu ma le fai ata tifaga o Damon Fepuleai, se tasi o alo o Samoa i Niu Sila nei, o le ata mālie e faaigoaina Red, White and Brass.
Lipotia e le leitio faasalalau a Niu Sila sa maimoaina i le Wellington Embassy Theatre i le po o le Aso Lua o le vaiaso nei ae o le po o le Aso Lulu i le faletifaga a le Hoyts i Silvia Park.
Fai mai o le vaitau o le 2011 i le taimi o le Ipu o le lalolagi i le lakapi lea e pueina ai le ata ma e molimau nisi ua mae’a maimoaina o se ata mo le aiga atoa.
Ua silia ma le 25 tausaga o galue Fepuleai i Niu Sila i le film industry ma o isi ana galuega e aofia ai ata faamatala, musika ma ata pupuu.
Na ia saunoa i lea lipoti o le uluai feature film lea ua ia faatonutonuina ma e umi se taimi na galue ai i lea ata aemaise na pue tonu i le taimi o le tetele foi o le koviti.
Saunoa Fepuleai i le lipoti o le faamoemoe ia toatele nisi faatonu mai le Pasefika i ata tifaga auā le faamatalaina o tala a le Pasefika auā na umi se taimi sa faamatalaina ai a tatou tala e isi tagata e le o ni faatonu poo ni tusitala mai le Pasefika.
