O le tusi e ta’ua o Siamani i Samoa mai le tausaga 1860-1914 o loo tusia ai talaaga o tagatanuu Siamani i ia vaitaimi ma tala ai o latou gafa i tagatanuu Samoa.
O lenei tusi o se finagalo a se tasi o tamalii o le atunuu ua failagi le folauga, ua loa lana tautua i upu fai a le Malo aemaise o pisinisi Susuga Joachim Joe Keil.
Na faamatalaina ai e lē sa tusia lenei tusi, Kasia Renae Cook le amataina mai o le galuega.
“O le tausaga 2018 na amatalia ai ona fai lenei tusi e se tasi o tamalii ia Joe Keil o ia e iai lona itu Siamani.
“Sa naunau lenei tama e na te tusiaina se tusi e faailoa ai le talaaga o tagata Siamani i Samoa ae peitai sa lē taunuu ona o le tulaga o le gasegase o le kanesa sa feagai ma ia.
“Ina ua iloa e Keil le tulaga o lona gasegase ona ia tuuina mai ai lea o le avanoa ia te au ou te faaauauina ai le tusia o le tusi mo ia.”
O lenei foi tusi e pei ona ta’ua e le tusitala o se fesoasoani lea i le toe faamanatuina mai le talaaga o tagata Siamani e iai o latou sootaga i Samoa i le lalolagi.
“E tele lava ni tusitusiga i le tusi lenei e tali ai foi le anoanoai o fesili i le mafuaaga pe faapefea foi ona oo mai tagata Siamani i Samoa aemaise lo latou sao i atunuu o le Pasefika.”
O faamaumauga o loo fesoasoani i le tusiaina ma le tuufaatasia o lenei tusi e mai le tele o faamaumauga mai i fale tusi, o nusipepa, o talaaga o Siamani ua mae’a ona tusiaina ma faatalatalanoaga ma aiga e iai lo latou sootaga i lenei talaaga.
“E tolu tausaga sa taumafai mai ai lenei tusi ma sa tuu i se isi vaitaimi ona o le tulaga sa iai le pepesi o le faamai o le Koviti-19.”
O le tuufaatasia ai o le tusi lenei sa faatupeina lava e Joe Keil faatasi ai ma le lagolagosua a lona aiga, o si ana uo mamae lē sa avea ma Sui Palemia o Samoa i nisi o paeaiga ua mavae atu le Afioga ia Misa Telefoni Retzlaff ma nisi o sui mai Amerika ma Samoa nei e iai le tomai i le toe faaleleia atili o faaupuga o le tusi.
“E telē le sao o le aiga o Keil i lenei galuega ma e faia uma nei auaunaga ona o le manatu alofa i lenei tamalii ma lona naunau ia taunuu si ana toe moemitiga i lenei tusi.
“E momoli ai lau faafetai tele ia i latou sa lagolagoina lenei galuega, ae faasilisili ai la’u faafetai i le Susuga ia Joe Keil i le a’e o se tofa e tuufaatasia lenei tusi e fai ma auala o faamaumauga mo latou o loo manaomia faamatalaga i talaaga o tagatānuu Siamani i Samoa.”
O le tusitala o sē e iai lona tikeri faafilosofia PhD i le gagana Siamani ma e tele ni ana suesuega ua mae’a tuufaatasia i tagatānuu Siamani i Toga.
O le tusi lenei ua faatauina nei i le kamupani a le SSAB i Samoa nei ma atunuu mamao.
