Ina ua mae’a le fonotaga a le asosi i le po anapo sa faia ai se palota a le asosi ma ona sui auai e filifilia ai se laulau fou auā le faatonutonu folau o galuega ma tapenaga a lenei foi asosi i le itu tau i taaloga.
I se pepa o faamatalaga mai le asosi ua filifilia ai le Susuga Arthur Mulitalo e avea ma Peresitene, Sui Peresitene ua filifilia ai Wolly Collins, o le Failautusi o Darren Young, Teutupe o Susie Poort ma sui e toalua John Alailima ma Tafaifaosalamasina Jennifer Brooks.
O le Peresitene sa iai i le tofi i le taimi muamua Afoa Seti Afoa sa taitaiina lenei fonotaga ma talanoaina ai nisi o mataupu o loo feagai ma le asosi.
E 46 sui sa palota ina ia aveese mai Afoa ma se tasi o ona soatau mai le tofi Peresitene ma le palota e toatasi sa lagolagoina le toe faaauauina o le tofi.
Na faafetaia ai e le asosi le tautua foi a lē sa avea ma Peresitene ma se tasi o ona sui i tausaga e tele.
O lenei fonotaga sa auau ai sui o le laulau a le Asosi o Taaloga a Samoa aemaise ai o mātua ma paaga o loo lagolagoina taumafaiga a le asosi, ma o se taeao fou lea i le tulai mai ai o le laulau fou mo galuega tauave aemaise ai o tapenaga a le ‘au mo taaloga a le Pasefika i le tausaga nei.
