Ua ma’ea su’esu’ega a leoleo ile tagi a le sui faipule o le itumalo o Salega numera tasi o le Minisita foi o Galuega tetele a le Malo le tofa Olo Afoa Fiti Vaai, ma ua fautuaina e leoleo le faia oni moliaga faasolitulafono faasaga ile ta’ita’i o le Itu agai le faipule o Lepa le susuga Tuila’epa Lupesoliai Sa’ilele Malielegaoi.
Ua faailoa mai e le Komesina o leoleo le susuga Auapaau Logoitino Filipo, o le faila atoa o le suesuega ma le fautuaga e faia ni moliaga ua i aao nei o le Loia sili a le Malo mo se isi iloiloga ma faamautu ai pe talia le fautuaga a leoleo pe ose isi faai’uga o le a taunuu iai lea iloiloga o mau ua tuuina atu iai e leoleo.
O le tagi a le afioga ile Minisita e mafua ise tuua’iga a Tuila’epa ise faatalanoaga a le taitai o le itu agai ma nisi o tusitala ini masina e lei mamao atu, sa tuuaia ai le tofa Olo i lona lesitala o se taavale landcruiser a le Malo i lona suafa ma ia faaaoga o sana meatotino. O se tuuaiga o loo teena e Olo Afoa Fiti Vaai ma o loo ia finauina ose tuuaiga ua faaleaga ai lona itumalo ma lona tagata ole sui usufono o lona itumalo ile Palemene, aemaise ua faaleaga ai ma lona aiga.
O le tuuina atu o le faila o le suesuega i le Loia sili, na faaalia e le Komesina o leoleo o le a gafa ai le Loia sili ma lona ofisa ma le tuuina atu o le mataupu ile faamasinoga mo le finauina pe afai e talia ma lagolagoina e le Loia sili le fautuaga e faia ni moliaga. E leo iloa le umi e faagasolo ai le iloiloga ma faamautu ai se faaiuga mulimuli, o le a iloa ai le faaauau o le tagi ile faamasinoga poo le le talia o le fautuaga a leoleo.
