O se tasi o mataupu tau faamasinoga i se lu’i faaletulafono ua tālia se faaiuga, o le talosaga a le taitai o le HRPP ma le sui faipule o lea vaega faaupufai le tofa Lealailepule Rimoni Aiafi faasaga i le faaiuga a le Palemene e pei ona faamalolo le tumau ai mo le 2 tausaga.
E fā vaega o loo autu iai lea finauga, o le faamalologa le tumau, o teuteuga o tulafono tumau i le vaega e faasino i le saolotoga e tuusaunoa ai manatu ma lagona o sui faipule o le Palemene e faamalolo le tumau, o le taofia o faamanuiaga tau totogi o Tuilaepa ma Lealailepule o se tasi o aiaiga o le la faasalaga, ma le finauga i le vaega e faasino i le maliega na malilie ai taitai o pati faaupufai e lua e toe ave i tua a latou tagi i moliaga e aafia ai gaioiga na tutupu i le taimi o le faigapalota tele ia Aperila o le tausaga e 2021.
Ua silia nei i le lua vaiaso talu ona mae’a iloiloga a le faamasinoga i le talosaga lenei ma sa seei ai faamasino e toalua o le faamasinoga maualuga le afioga i le Faamasino Sili, Satiu Simativa Perese ma le susuga Leiataualeasa Darrel Clarke.
E le o iloa se aso e fofogaina ai se faaiuga o le mataupu.
