Ua mae’a nei se tasi o galuega tele sa fuafua mai e le Malo i tausaga ua tuanai ma sa feagai ma le Komisi o le Gagana Samoa, o le tuufaatasia lea o se tusi e avea ma ta’iala o le gagana Samoa.
O le faai’uga o le vaiaso ua mavae na faalauiloa ai e le ta’ita’i o le Malo le afioga i le tamaitai Palemia, le mae’a o lea galuega e ala i le Tusi Faatonu’upu o le Gagana Samoa poo le Samoan Monolingual Dictionary.
O se galuega e pei ona faailoa e le tamaitai Palemia le afioga Fiame Dr Naomi Mataafa i lana saunoaga, o le a avea ma taiala o le faaaogāina o le gagana Samoa e o tatou tagata i Samoa ma atunuu i fafo.
O le tasi foi o ona tāua ma aogā o le faatumauina ai o le tatou gagana ia lē alu alu faapea ua mou ma ua leai se gagana Samoa.
Ua molimoli ai le faafetai a le ta’ita’i o le Malo i le Komesina o le Komisi o le gagana Samoa ma lana augalulue ona ua tino mai le galuega mo tupulaga o le atunuu mo nei ma a taeao aemaise i latou e lei fananau mai aua o se tusi o le a faatonutonu ai le tatou lava gagana o le tatou tofi mai le Atua.
O le tāua o le galuega ua mae’a nei ona o le a fetaiai ma luitau o suiga eseese e ono lepeti ai le gagana Samoa ma lona faaaogāina aemaise o fesootaiga faatekonolosi o nei onapo ua fanau mai ai le tele o upu fou.
O nisi ua faafetaia e le Palemia i le galuega ua mae’a o ekalesia, nuu ma afioaga, matagaluega a le Malo, o le fesoasoani a malo o Niu Sila ma Ausetalia faapea le UNESCO o se itutino o Malo Aufaatasi.
