Ua sā’ilia nei nisi e talosaga i avanoa o fa’auluuluga o nisi o pulega ma auaunaga tuma’oti a le malo ina ua lata ina mae’a le 3 tausaga o konekarate a i latou o loo se’ei i ia tofiga. Ua fa’ailoa i auala o fa’asalalauga a le malo le tatala ai nei o le avanoa e tusi talosaga ai nisi i le tofiga o le Pule o le kamupani va’alele o le Samoa Airways lea o loo tau’ave i le taimi nei e le afioga Fauo’o Fatu Tielu.

O Iulai o le tausaga e 2022 na filifilia ai lea tamali’i e nate tauave lea tofiga i se tulaga faavaitaimi poo le interim Manager ma ua fa ai nei tausaga o lana tautua i le malo i lea tofiga.

Ua fa’ailoa foi i auala o fesoota’iga a le malo e lua isi tofiga tau fa’auluuluga o le kamupani va’alele o le tofiga sinia i le tau’aveina o auaunaga ‘ese’ese poo le chief operation officer, ma le tagata e va’aia le vaega o tupe le chief finance officer o lo’o sailia foi nisi e talosaga atu iai..

O le faalapotopotoga o le malosi tau eletise ua faasalalau foi ni tusi talosaga mo nisi e fia tautua i le avea ma Pule o lea auaunaga tumaoti, lea o loo se’ei ai i le taimi nei le afioga Faumui Iese Toimoana ma o Novema o le tausaga e 2023 na toe filifilia ai mo le lona lua o ana konekarate tai tolu tausaga.

O le pulega o malae vaalele tasi lea auaunaga tumaoti a le malo ua sailia foi nisi e talosaga i le tofiga pule, lea o loo tau’ave i le taimi nei e le afioga Tumanuvao Evile Faleefatu na ulua’i tofia e fa’auluulu iai lea tautua a le malo ia Tesema o le tausaga e 2023.

O le avanoa o le pule o le fa’alapotopotoga o le malosi faaeletise ma le pulega o malae vaalele sa fa’asalalau muamua ae o lea ua toe fa’asalalau.