O le siitaga mulimuli o le totogi pito maualalo i Samoa o loo faamauina na faatino i le amataga o le tausaga 2020, tusa ua fā ai nei tausaga.

O le masina amata o le tausaga nei 2024 na faatino ai le isi iloiloga sa galulue ai le tafatolu o auaunaga a faalapotopotoga o tagata faigaluega i le vaega tuma’oti ma le Matagaluega o Alamanuia, Pisinisi ma Leipa.

O lea la ua mae’a le iloiloga ma o loo faatali nei i se finagalo o le Kapeneta pe iai se siitaga mo le totogi pito maualalo le minimum wage lea o loo 3 tala nei i le itula, pe o le a tumau pea.

Na faailoa e le Ofisa Sili o le pulega o le Matagaluega o Alamanuia, Pisinisi ma Leipa, e lē faigofie le faia o se siitaga auā e fua i le malosi tau tupe o pisinisi ma kamupani tuma’oti o loo maua ai galuega mo tagata.

Na faailoa foi e le Ofisa Sili le susuga Pulotu Lyndon Chu Ling, o lea ua aiaia nei i teuteuga fou o le tulafono o leipa le tai lua tausaga ma faatino iloiloga i le totogi pito maualalo, e lē pei o le tulaga sa iai muamua sa faafuaseia le faia o iloiloga pe a iai se manatu ua tatau ona fai se siitaga.

O le avanoa o nisi o tusitala sa fesiligia ai le susuga Pulotu Lyndon Chu Ling o le Ofisa Sili o lea matagaluega a le Malo na avanoa ai ona tuliloa i le mataupu i pisinisi tau faleoloa e umia e tagata Samoa laisene, ae o tagata mai fafo o loo faafoeina.

Faaalia e le Ofisa Sili ua feololo lava pisinisi ua maua o solia aiaiga o laisene pisinisi.

Le Ofisa Sili o le pulega o le Matagaluega o Alamanuia, Pisinisi ma Leipa, susuga Pulotu Lyndon Chu Ling.