Ua mae’a mai feiloa’iga i le Iunaite Setete o Amerika a le ta’ita’ifono o le vaega faaupufai o le Faatuatua i le Atua Samoa ua Tasi ma nisi o sui faipule o lea pati ma sui lagolago sa malaga e feiloa’i ma sui lagolago o le vaega faaupufai i lea vaega o le lalolagi, sa momoli ai le faafetai i le latou tapua’iga, ae o lea ua taunuu i Niu Sila le ta’ita’ifono le susuga Laauli Leuatea Polataivao Fosi Schmidt ma lana aumalaga.
O le faamoemoe o le fia feiloa’i ma momoli foi le faafetai i le tapua’iga aemaise o le lagolago i le Faatuatua i le Atua Samoa ua Tasi, a o faagasolo tapenaga o le palota tele a le atunuu i lena tausaga ua mavae. Ua mae’a ona feiloa’i le aumalaga ma sui lagolago i le aai o Kalaiesetete, ae o le afiafi o le Aso Lulu na taunuu ai i le laumua i Ueligitone.
Le ta’ita’ifono o le Faatuatua i le Atua Samoa ua Tasi le afioga i le Minisita o Faato’aga ma Faigafaiva, susuga Laauli Leuatea Polataivao Fosi Schmidt, i se vaega o lana saunoaga i le feiloa’iga ma le mamalu o Samoa i le Laumua i Ueligitone.
O le a taualuga ia feiloa’iga i le aai tele o Aukilani i le faai’uga o lenei vaiaso, ma toe taliu mai ai i fanua le faigamalaga.
