Ua tu lata le vaivaa o le faigāpalota a Niu Sila, lea ua toe 3 nei vaiaso ona faataunuuina lea, e saili ai se vaega faaupufai latou te taitaiina le malo i ona tiute masani.
Ua maitauina foi i le taimi nei le maamaai o mata o peni o faatosina a party taitasi e mailei ai le palota a le tagata palota I se faipule ae o se party e lilifa iai le lagolago a tagata palota lautele.
O le afiafi o le Aso Tofi na faataunuuina ai le faatalatalanoaga i le hall a le Ekalesia Katoliko i St Annes i Manurewa i sui tauva mai party taitasi e faailoa ai a latou manulauti poo anavatau lea ua faataoto mo le malo i le isi paeaiga o loo loma nei.
E 6 party sa ave iai le faatalosaga ina ia mafai ona auai atu, peitai e oo atu i le afiafi e faataunuuina ai lenei faamoemoe ua lē mafai ona auai atu le sui o le ACT, ma le sui o le NZ FIRST, ae na o le sui o le Labour Party ia Hon Jenny Salesa, sui o le National ia Agnes Loheni, sui o le Te Pati Maori ia Arabella Boatright ma le alo o le atunuu o loo momo’e i lalo o le fu’a a le Green Party ia Faanana Efeso Collins.
E toatele foi le mamalu o le atunuu sa faapea ona auai atu e fia faalogologo ma fia iloa ma malamalama poo fea o loo agai iai taufetuliga a nei party ma a latou anavatau.
Ua suifefiloi lanu ma gagana i lea po mai tagata ma ua maitauina foi le toto’a o le faalogologo a le mamalu o le atunuu a o faasoa nei suitauva ma tali i fesili o loo tuuina atu e le laulau.
O le isi mataupu o loo laualuga i anavatu a le National, Labour ma le Green o le latou fausia lea o fale e 1,000 i totonu o le tausaga, ae sa fesiligia foi e le laulau i lea po sui nei, pe ono toe maua se faamanuiaga mo tagata lautele ia ua ova aso i Niu Sila pe a faatusatusa i nai tagata Initia lea sa toe faafoi i le latou atunuu i nai vaiaso ua mavae ina ua leai ni galuega, peitai sa lē manino i le aufaafofoga i lea po se tali ma’oti mai i nei sui tauva.
Sa fesiligia foi le tulaga i fale o le housing o loo iai nei i le tele o igoa o loo faaigoa ai, peitai sa lē malamalama ma ma’oti tali sa tuuina mai mo le atunuu.
Ae o le vaega sili ona tāua i lea afiaafi ua toatele tagata ua auai atu ma latou faalogologo i anavatau a nei party e fuafua foi iai a latou faiga filifiliga pe a oo i le aso o le palota.
Sa maitauina le toatele o nisi o sui tauva sa auai atu e lagolago a latou sui lea ua filifili mo le taliga fesili.
O lenei polokalame sa tuufaatasia lea e le Election Forum mai le Auckland Catholic Diocese Justice and Peace and Commission Caritas Aotearoa NZ.
