O le faamavaega a sui faipule o itumalo faapalota o Faleata 4 ma Siumu mai le toe avea ma sui auai o le pati faaupufai e puipuia aiātatau a tagata, o se mataupu e ma’ale’ale ma faaeteete gata ona o aafiaga o aiātatau o ia sui usufoo o le Palemene.
Ua faailoa lea tulaga i se finagalo faalauaitele o le afioga i le Fofoga Fetalai susuga Papalii Li’o Oloipola Ta’eu Masipa’u, i se faasalalauga faalauaitele ma ua faia ai lana faaiuga e tuuina atu le mataupu i luma o le Fono Aoao Faitulafono i lana fonotaga o le aso 20 o le masina fou o Tesema.
Ua faaalia e Papalii ua tuuina atu le tusi a le taitai o le vaega faaupufai e puipuia aiātatau atagata o le taitai foi o le Itu agai e ui o loo faamalolo le tumau, ua avatu ai sona finagalo i le faagafua poo le avanoa ai o nofoa o ia itumalo ona o faamavaega a le tofa Ale Vena Ale ma Tuuu Anasii Leota, peitai o lana silasila o se mataupu e tatau ona faatāua ai aiātatau faalefaavae o ia sui faipule e pei ona aiaia i le Mataupu 47 o le Tulafono Faavae o le Malo Tutoatasi o Samoa.
O le tuuina atu o le mataupu i le fonotaga o sosoo ai nei a le Palemene o le a maua ai ma se faaiuga.
Ae i le pitolaau a le Ofisa o le Komisi o Faigapalota, ua faailoa e le sui Komesina le susuga Lefau Francis Ainuu i le nusipepa o le Samoa Observer, o loo fai mea faalogo i le Fofoga Fetalai i se tusi faapoloaiga poo se writ, e faailoa atu ai le faia o ni palota laiti pe afai o le tulaga lea e taunuu iai.
