O le faalauiloa o seleselega ma faamanuaiaga ua maua e aiga o loo malaga o latou tagata i galuega faavaitaimi i le polokalame a le afioaga o Poutasi i Falealili, ua ave ai ma le lu’i a le tamaitai Palemia i le atoaga o le 15 tausaga o le polokalame a le afioaga, ia faatāua e alii ma tamaitai o loo maua ia galuega le toe foi mai i Samoa e atiina a’e o latou aiga, ma faaaogā le laueleele e saili ai le lumanai auā o lo latou sao lea i le tamaoaiga o le atunuu.
O le Aso Faraile na te’a nei na atoa iai le 15 tausaga o le polokalame o tagata faigaluega faavaitaimi a le afioaga o Poutasi lea o loo malaga ai tupulaga o le afioaga. Sa faalauiloa ai a latou seleselega ma faamanuiaga ua maua i tupe o le polokalame e pei o taavale, o fale, ma isi pisinisi ua mafai ona latou faatino i seleni mai galuega faavaitaimi.
O le finagalo o le ta’ita’i o le Malo na valaau faaaloalo iai le afioga Tuatagaloa Joe Annandale o loo faauluulu iai le polokalame e saunoa i le aso faalauiloa o seleselega o galuega faavaitaimi a Poutasi ma sami ai le 15 tausaga o maua pea e le afioaga le avanoa e malaga ai o latou tagata e galulue i Niu Sila ma Ausetalia.
Na faailoa ai foi e le tamaitai Palemia le Afioga Fiame Naomi Mataafa, o loo feagai nei le Malo ma le sailia o auala e puipuia ai le siosiomaga i le aumaia o taavale e alu i le eletise, ma o se isi lea o vaega e silasila iai tamafanau a Poutasi o loo maua faamanuiaga tau tupe mai ia galuega pe a fuafua e toe faatau se taavale mo le aiga, auā e saogalemu le siosiomaga i taavale ua alu i le eletise, nai lo taavale e ola i le penisini ma suauu. Na ave le faamalo a le tamaitai Palemia i le afioaga ona o le mautu o le faavae o le latou polokalame, i le faia muamua o faato’aga e ola ai aiga ma le nuu, a o le’i malaga o latou tagata i galuega faavaitaimi.
O se faavae na faaalia e le ta’ita’i o le Malo e fai ma faata’ita’iga lelei mo isi nuu ma alalafaga o loo malaga foi o latou tagata i ia avanoa faigaluega. O le faamoemoe sa faatino i le faai’uga o le vaiaso na te’a nei sa auai sui o Malo o Niu Sila ma Ausetalia e faamautu i Samoa ma o se avanoa lelei ma tāua na molimauina ai e sui o ia Malo o loo maua ai galuega faavaitaimi, seleselega ua maua e aiga o Poutasi ona o galuega o loo ofo mai e ia Malo o ni pa’aga totino a le Malo o Samoa.
