Ua amata ona galoma atu siuleo o atugaluga, ma siuleo o le aulagolago i le suiga o le taimi poo le Daylight Saving ua silia i le 10 tausaga o faia e Samoa e pei o atunuu ua masani ai i lea suiga i le taimi lenei o le tausaga e faatino ai.
E ui ina toe foi le taimi i Samoa i le tulaga sa iai i le tele o tausaga ua tuanai, ae o le faia o le suiga i le tausaga na tea nei ina ua see atu le faigamalo fou, e iai nisi na feseta’i ma tuu fesili poo le a le taimi sa’o, ina ua suia le taimi i le po o le Aso Toonai ae malama le Aso Sa na tea nei.
Na mafua le feseta’i ona o masini faatekonolosi e pei o telefoni na otometi lava le sui o le taimi, ma mafua ai ona usupo nisi e fai faatauga, ma nisi na vave usu i sauniga lotu.
O le tausaga ua mavae ina ua taofia le suiga o le taimi na folafola ai e kamupani telefoni feaveai, o le a galulue e toe fetuuna’i le polokalameina o a latou telefoni ina ia taofia le suiga o taimi e pei ona polokalame ai mo Samoa a o faia le daylight saving.
Peitai ua silia i le tausaga ona taofia lea tulaga ae o loo aumai lava ia masini faatekonolosi e lei suia lo latou polokalameina, ina ia tasi ai lava le taimi poo le itula o le uati e faailoa i luga o telefoni e aunoa ma le toe suia.
