E lua feagaiga ua mae’a sainia e le afioaga o Poutasi, ma le itumalo o Falealili ma le itumalo o Hawke’s Bay i Niu Sila lea o loo toatele alo ma fanau a Falealili o loo galulue ai i galuega faavaitaimi.

O ia feagaiga ua faamautu ai le galulue faatasi o itumalo e lua e tausia le nofo lelei ma femalamalamaa’i ina ia mafai ai ona faaauau pea le mafutaga ma sootaga e ala i galuega faavaitaimi ua manuia ai aiga o Poutasi aemaise o le itumalo o Falealili.

O se tasi o tamalii o le atunuu o loo faamautu i Hawke’s Bay le tofa Tuisalega Seleni Farani, sa ia faamatala vaega tāua o le feagaiga poo se maliega foi, auā o ia sa faatulafale i le fesaga’iga a Poutasi ma le aumalaga mai Hawke’s Bay i le faamautu ma le sainia o le feagaiga na faatumutumu i le faaeeina o le suafa matai tamalii o le Toosavili i le tamaitai Pulenuu, o se faipule o pulegamalo faaitumalo i lea vaega o Aukilani Niu Sila, le tamaitai o Sandra Hazlehurst.

Le tofa Tuisalega Seleni Farani.

O le afioga Tuatagaloa Joe Annandale o loo taulamua i le osiga feagaiga ua faamautu, ma o ia foi sa amatamea i le polokalame o le auina i Niu Sila o tagata faigaluega faavaitaimi mai lona nuu o Poutasi faapea ma le itumalo o Falealili.

O ia foi ua na to le matupalapala i le suafa Toosavili mo le tamaitai pulenuu o Hasting o se nofoaga o loo tele faatoaga o loo galulue ai o tatou tagata.

Le afioga Tuatagaloa Joe Annandale.

O le aumalaga mai le itumalo o Hawke’s Bay o loo aofia ai nisi o faipisinisi ma faifaatoaga o loo auai i le fono tauati a le faalapotopotoga o le WE Mana o se auaunaga tau suetusi ma tausitusi o loo faafoe e se tamalii Samoa ma lona toalua o se tamaitai Maoli.

Ua fā tausaga o faagaioia le ofisa o le WE Mana i Samoa ma o le taimi muamua lea ua faia mai ai i lo tatou atunuu le latou fonotaga o loo auai ai foi nisi o sui faipisinisi mai Niu Sila.