Ua toalua sui faipule o le Itu agai ua afea i ni vaega o a la saunoaga faalauaitele i le tala autu o le tupe, mataupu na mafua ai le saunoaga faaminisita a le taitai o le Malo le afioga Fiame Naomi Mataafa.
O le sui faipule o Falelatai ma Samatau ma le faipule o Faasaleleaga Numera 5.
E taga tasi finagalo o ia sui faipule i le tatau ona faamavae o le minisita o le Kapeneta o loo laumanuia i le taofia o le malaga a le vaa mulimuli mai Savaii ae faatali tulisi mai Saina, ma malaga togipau mai Saina lea ua taofi ma ua momotu sootaga o sui mautofi o le Malo ma le Travel Focus i Hong Kong na lotolotoi i le aumaia o ia malaga togipau.
O loo tapu ona afea le saunoaga faaminisita a le Palemia ona ua pasia le lafo ua faataatia ai le saunoaga i le laulau a fono a le Palemene i le faamoemoe e talanoaina i se taimi.
Peitai e lei logosaia e nisi o faipule lea faaiuga a le fofoga fetalai.
Ni vaega o taualumaga a le Palemene o loo faagasolo i lenei vaiaso i saunoaga faalauaitele o le tala o le tupe mai le sui faipule o Falelatai ma Samatau le afioga Lupematasila Tologata Tile, ma le sui faipule o Faasaleleaga Numera 5 le afioga Peseta Vaifou Tevaga’ena.
