Ua faaopoopo foi le numera o taulaga i faaitu o Niu Sa Uelese ua lapataia e mataitu lologa i o latou pitonuu i nai aso o lumanai ai.

O loo iai popolega mo komiuniti i Bedgerabong, Jemalong ma Corinella ae o le vaega a le SES o loo latou la’uina taga oneone i faaitu ia ia taumafai ai e puipuia mai le ulufia e le suavai o fale o aiga faapea foi ma isi nofoaga. 

E oo mai lava nei o loo afaina pea isi foi faaitu lalata ane i pitonuu ia i lologa ma o loo galulue ai foi le vaega fesoasoani lea mo nai aiga ma komiuniti ua aafia meatotino ma fanua i faiga a tafega ua aafia ai ia pitonuu. 

O loo lelei le tau i Sini ma isi vaega lalata ane peitai o le tala o le tau aupito lata mai o loo feta’ua’ina ai foi timuga ma e le o mapu le vaaitau i le lapatai pea o le atunuu i tulaga o le tau ae faapea foi i le ofisa o leoleo i le fautuaina o le atunuu ia alofia le malaga i nofoaga o loo iai lologa ma e sili lava le puipuia i lo le tau togafitia.