Talu ona ta’i lua masina ma faailoa tau fou o suauu ma penisini, ua aliali mai togafiti a le au fai pamu o le ta loka o a latou auaunaga i le aso mulimuli o le masina, a o le’i amata faamamalu tau o le masina fou.
Na tupu i le taimi na amata ai ona siitia maualuga le tau o ia oloa, ma toe tupu foi i le aso mulimuli o Iulai a o le’i amata le siitaga maualuga ua iai nei penisini ma suauu mo le masina fou o Aokuso.
E lē o maua se faamatalaga mai le matagaluega o Tupe a le Malo i se gaioiga e tatau ona fai i lea tulaga ae to’atele le au fai taavale na mafatia ai, i le afiafi o le Aso Sa na te’a nei i le tau saili o se pamu e utu ai a o le’i aumai tau fou o ia oloa. Ua faatitino faiga nei a le au fai pamu penisini ina ua muamua mama mai i tua tau fou o Aokuso ma salalau solo i luga o le api o foliga, ma saili ai e le matagaluega o tupe e faia tau o suauu ma penisini poo ai ua na faasalalau i auala o fesoota’iga televavave ia tau fou, a o le’i faailoaina i tulaga masani.
E oo mai i le taimi nei ua amata tau fou o ia oloa, ua maua e nisi o tautua tau faasalalauga le lisi o tau fou o suauu ma penisini ae e le’i maua lava e isi auaunaga o faasalalauga. O tau fou o ia oloa o le penisini ua $4 tala 36 sene i le lita faatusa i le tau sa iai i masina o Iuni ma Iulai sa $3 tala 74 sene i le lita. O le suauu kiso (diesel) o lea ua lele ane i luga i le $4 tala 69 sene i le lita.
O lona tau sa iai i le lua masina ua mavae sa $3 tala 98 sene i le lita. O le kalasini sa $3 tala 52 sene i le lita o lea ua siitia nei i le $4 tala 24 sene i le lita.
