O le taeao ananafi i le taimi Niu Sila, ua lipotia mai le loka ai e leoleo i Peretania, le uso laitiiti o le Tupu o Peretania, o lē sa faalagi o le aloalii, Prince Andrew, lea ua faalagi nei o Andrew Mountbatten-Windsor, ona o masalosaloga i ni amioga lē tatau na aafia ai a o iai i tofiga faalemalo.
O le aso tonu foi lea na atoa iai le 66 tausaga o le soifua o Andrew, lea na loka mai ai e leoleo, ina ua maua nisi faamatalaga mai faila fou ua faato’ā alia’e o le alii milionea o Jeffrey Epstein lea na faamaonia ana soligatulafono o feusua’iga sa faia ma ni tama’ita’i talavou.
O le tula’i mai o lenei matāupu na faaoo ane ai se faamatalaga faalaua’itele mai lana afioga i le Tupu o Salesa ma ia ta’ua ai i se vaega o lana malelega, e lagona le mafatia i le mea ua tupu i se sui o lona aiga, ae iai lona mautinoa o loo faagasolo lava galuega a malu o le malo e pei ona tatau ai, ma e pei ona ia faailoa foi i se taimi ua te’a, o le a lē faalavelave lava latou i galuega a leoleo ma o le a nofosauni foi e fesoasoani atu i ni mea e moomia ai e leoleo la latou lagolagosua.
I se lipoti lata mai o lenei matāupu ua ta’ua ai, o lea ua toe tatala i tua Mountbatten-Windsor, ae o loo faagasolo pea su’esu’ega ma e le’i maua mai i le taimi nei pe ua faia ni moliaga.
O le a tulituli pea se isi lipoti mai lenei matāupu, ona e ui lava ua aveesea uma mamalu sa iai i lenei tagata o le aigatupu, ae ona o ia o le uso o le Tupu, e mautinoa le taula’i uma atu ai o le maimoa a le lalolagi i le aigatupu ma se latou aafiaga i lenei matāupu.
Puna o Faamatalaga: https://www.bbc.com/news/articles/cx28yel4811o
