Na matuai faatumulia le malaevaalele a Sini Ausetalia i tagata Samoa ma tagavai o le atunuu na faalealea ai e faatali le taunuu atu o tama o le Toa Samoa.
O pese faafetai ma le viiga e foi i le Atua na lagiina foi i le malaevaalele e faaali ai lo latou fiafia e toe faafeiloai alo o le atunuu lea na auai i le sailiga siamupini a le Lakapi Liki. O le sagisagi fiafia atu e le gata o tina ma tama matutua, o talavou ma fanauiti, o aiga o tama taaalo faapea le mamalu o le atunuu o loo aumau i Ausetalia na matuai faatumulia ai le malaevaalele i Sini.
O se vaaiga uigaese ma na iai foi ma sikulati o le malaevaalele ina ia mautinoa e sologa lelei le faataliga o le ‘au. Na fai si umi o talitali le toatele ae se’i faamuamua le tele o le pasese ona mulimuli ai lea savavai faatasi mai le ‘au a le atunuu.
O loimata maligi na vaaia ina ua feiloai atu tama i o latou aiga talu ona valavala mo le 6 vaiaso ona o le taamilosaga.
O nisi o tagata malaga atu i Ausetalia ua tuufesili poo sa’o le malaevaalele lea ua taunuu iai ona ua toetoe lilofia atoa le vaega e taunuu iai pasese i tagata Samoa o loo faalealea a latou fu’a o le tagavai a Samoa.
E pei ona silafia o aga lava o le fiafia ona o taumafaiga a alo a le atunuu le Toa Samoa, ua o latou faatu ai se isi matatia mo le atunuu o le ‘au muamua o le Pasefika ua sao atu i le sailiga siamupini.
Ua faailoa foi e nisi o lipoti e iai isi tama taaalo ua o latou ta’ua e tatau ona fai nisi test match mo le Toa Samoa ma isi ‘au tetele e pei o Niu Sila, Ausetalia ma Egelani.
Ta’ua mai foi i lipoti mai Samoa, o le a iai foi se faataliga aloaia mo le ‘au o loo tapena i ai le malo pe a faamautinoa mai se aso e malaga faatasi uma atu ai le ‘au atoa ma lana pulega.
